Sa programa sa pagladlad og dugang mga linya, ang Bohol Water mopahibalo nga nagpadayon karon ang pagbutang og bag-ong linya subay sa CPG North Avenue, gikan sa eskina Baguio Drive padulong sa eskina Salazar Street, Barangay Ubujan. Ang pagladlad sa linya ginabuhat sa matag pikas sa kalsada aron mas mapadali ang pagkonektar sa mga konsumidor inigkahuman sa proyekto.
Subay niini, nagpadayon usab ang pagladlad og bag-ong linya ug pagpuli sa mga daang linya sa ubang lugar. Sa Toledo Street, Barangay Dao, ang pagbutang sa bag-ong linya anaa na sa 88% nga pagkahuman. Samtang sa Zamora Street sa maong barangay, ang pagpuli ug pagpadak-an sa daang linya anaa na sa 85% nga makompleto.
Sa nagpadayon nga kampanya batok sa mga delinquent accounts, ang Bohol Water nagpahinumdom sa tanang konsumidor nga tumanon ang obligasyon sa pagbayad sa water bills sa hustong oras.
Ang maong lakang gituyo aron malikayan ang pagdako sa bayronon tungod sa pag-abot sa laing billing period kon dili mabayaran ang kasamtangang balanse. Pinahiuyon sa polisiya sa kompanya, ang koneksyon sa tubig pagaputlon kon molapas na sa due date ug dili mabayaran hangtod sa ikaduhang bulan.
Busa, giawhag ang tanang konsumidor sa pagbayad sa takdang oras aron malikayan ang kahasol ug pagkaputol sa serbisyo.